ÁSGRÍMUR SVERRISSON
Stutt ferilágrip
Ásgrímur Sverrisson er fæddur 1964. Hann gerði fjölda stuttmynda á unglingsárunum og voru ýmsar þeirra verðlaunaðar á hátíðum heima og erlendis. Ásgrímur stundaði nám í leikstjórn við hinn virta National Film and Television School í Bretlandi og útskrifaðist þaðan 1994. Bæði fyrir og eftir námið hefur hann unnið fjölda kvikmyndaverkefna af fjölbreyttum toga; þ.á.m. heimildamyndir, leiknar sjónvarpsmyndir, auglýsingar og tónlistarmyndbönd auk margskonar dagskrárgerðar fyrir sjónvarp. Þá var hann einn af fimm leikstjórum bíómyndarinnar Villiljós sem frumsýnd var 2001.
Ásgrímur hefur verið ritstjóri tímaritsins Land & synir frá upphafi (1995) ef undan eru skilin þrjú ár (98-01). 2003 hóf Land & synir göngu sína á vefnum (www.logs.is) og er það nú ein helsta frétta- og upplýsingaveita um íslenska kvikmynda- og sjónvarpsgeirann. Ásgrímur hefur einnig starfað sem kvikmyndagagnrýnandi, bæði fyrir sjónvarp og prentmiðla og hefur auk þess fjallað um kvikmyndir á ýmiskonar vettvangi um margra ára skeið. Þá var hann einn þeirra sem komu Edduverðlaununum á fót 1999 og var framkvæmdastjóri þeirra fyrstu þrjú árin. Hann situr nú í stjórn Íslensku kvikmynda- og sjónvarpsakademíunnar fyrir hönd Samtaka kvikmyndaleikstjóra.
Nýjasta verk Ásgríms er Taka 2, tíu þátta röð sem frumsýnd var í Sjónvarpinu veturinn 2005, þar sem spjallað er við íslenska kvikmyndaleikstjóra um verk þeirra og sýnd brot úr þeim. Önnur tíu þátta röð um sama efni var sýnd í Sjónvarpinu á tímabilinu maí-júlí 2006.
